طريقة عمل لبن الشاي او لبن ابو قوس بالصور

من طرف **هيام هانم** السبت يناير 15, 2011 8:51 am

اللبن المبخر
Evaporated Milk

أعتقد ده بتسموه فى دول الخليج لبن أبو قوس
أو لبن الشاى بيدخل فى عمل أنواع كتييير من الحلويات وإن شاء الله أبقى أعمل لكم منها
اللبن ده عبارة عن لبن عادى لكن مبخر يعنى متشال
منه نسبة كبييييرة من المية اللى فيه

علشان تعملى كوب من اللبن المبخر
هتحتاجى 2 كوب وربع لبن عادى
نجيب الحلة ونرشها زيت خفيف قوى قوى
وتحطى فيها مقدار اللبن على
نار متوسطة
وخللى عينك عليها مهم قوى وتقلبى على طول
علشان اللبن ما يلزقش
وأول ما تشوفى اللبن إبتدا يطلع منه بخااار
خلووووو باااالكم بخاااار مش بيغلى ولا بيبقلل
يا دوب بخااار توطى النار على طول
هااااادى خالص على أوطى درجة
وتقلبيه كل شوية

[ندعوك للتسجيل في المنتدى أو التعريف بنفسك لمعاينة هذه الصورة]

تفضلى تقلبيه كل شوية
وتآخدى بالك منه هيآخد حوالى ساعتين أو
ساعة ونص حسب بوتاجازك المهم
عايرى اللى طلع من الحلة لو كوب تبقى كده مظبوط
لو أكتر رجعيه تانى فى الحلة وخليه على نار
هادية
ممكن يطلع عندك وش كده أنا بأصفيه فى الآخر
وأهه بعد ما طلع كوب عيارى بالتمام والكمال

[ندعوك للتسجيل في المنتدى أو التعريف بنفسك لمعاينة هذه الصورة]

طبعا هتيجى واحدة كسلانة زيي وتقول لى
حرام عليكى يا أم حسن ساعتيييييييين علشان
أعمل كباية لبن ومش هأطبخ كده
هأقول لك فيه طريقة متآخدش ثوانى
لكن طبعا مش بتدى نفس الطعم لكن ممكن لو
مستعجلة
فعلا ومش قادرة تستنى

لو عندك لبن بودرة حطى 2/3 كوب لبن بودرة
مع كوب إلا شوية ميه فى برطمان
وهزيها جامد لغاية لما يدوب
وبس فيه أسهل من كده؟